ኢትዮጵያ በአፍሪካ የአምራች ኢንዱስትሪና የኢኖቬሽን ማዕከል እንድትሆን አልመን እየሰራን ነው(አቶ ሀሰን መሀመድ)

ህዳር3/2018 ዓ.ም(ኢ.ሚ)የንግድ፣ የኢንቨስትመንትና የቴክኖሎጅ ፈጠራ ስራዎችን በተመለከተ የኢትዮ-ስዊድን የቢዝነስ ፎረም ተካሄደ፡፡

በመርሀ ግብሩ ተገኝተው ንግግር ያደረጉት የኢንዱስትሪ ሚኒስቴር መሰረተ ልማትና ግብአት ዘርፍ ሚንስትር ዴኤታ አቶ ሀሰን መሀመድ ኢትዮጵያ በአፍሪካ የአምራች ኢንዱስትሪና ኢኖቬሽን ማዕከል እንድትሆን አልመን እየሰራን ነው ብለዋል፡፡

አቶ ሀሰን ስዊድን ከጥንት ጀምሮ በኢትዮጵያ የልማት ጉዞ በተለይም በኢንዱስትሪ፣ በጤናና በትምህርት ጉልህ ሚና ስትጫወት የቆየች ሀገር መሆኗን ጠቅሰው ኢትዮጵያ ያሏት የተቀናጀ የአግሮ ኢንዱስትሪ ፓርኮችና ምቹ የኢንቨስትመንት ፖሊሲ ለሁለቱ ሀገራት የሁለትዮሽ የቢዝነስ ትስስር የላቀ አስተዋጽኦ እንደሚኖረው አብራርተዋል፡፡

የስዊድን የውጭ ጉዳይ ሚኒስቴር ተወካዮች በበኩላቸው ስዊድን ውስጥ ከሚኖሩ አፍሪካዊያን መካከል በርካታ ኢትዮጵያዊያን መኖራቸው የሁለቱን ሀገራት የቢዝነስ ትስስር የበለጠ እንደሚያሳልጠው ተናግረዋል፡፡

ኢትዮጵያ በተለያዩ ዘርፎች ያሏት የኢንቨስትመንት አማራጮች በኢንቨስትመንት ኮሚሽን አማካኝነት የተገለጸ ሲሆን የቢዝነስ ፎረሙ ዋና ዓላማም በስዊድንና በኢትዮጵያ መካከል የሁለትዮሽ የኢንቨስትመንት፣የንግድና የኢኖቬሽን ትብብርን ማጠናከር መሆኑን ማወቅ ተችሏል፡፡

በመርሀግብሩ በተለያዩ ዘርፎች የተሰማሩ የሀገር ውስጥና የውጭ ባለሃብቶችን ጨምሮ የሚመለከታቸው መንግስትና የግል ተቋማት ተሳትፈዋል፡፡